| पुस्तक | कार्तिकनची प्रतिज्ञा | लेखक | संकल्प अभ्यंकर |
|---|---|---|---|
| प्रकाशन | शारदा प्रकाशन | समीक्षण | पंकज नावरकर |
| पृष्ठसंख्या | १६८ | मूल्यांकन | ४.५ | ५ |
काही पुस्तकं तुम्हाला एका वेगळ्या जगात घेऊन जातात, जिथे वास्तव आणि कल्पनेचा सुरेख संगम असतो. "कार्तिकनची प्रतिज्ञा" असंच एक पुस्तक आहे, ज्याने मला अक्षरशः भारावून टाकलं. मानव आणि दानव यांच्यातील संघर्ष, पुराणातील रहस्य, आणि वर्तमानाशी जोडलेली कहाणी. हे सगळं वाचताना माझ्या डोळ्यांसमोर जणू चित्रपटच उभा राहिला.
"संकल्प अभ्यंकर" यांनी या कथेच्या माध्यमातून आपल्या पुराणकथांना एका नव्या शैलीत मांडलं आहे. ऋग्वेदातील श्लोक, वेद-पुराणांतील संदर्भ, आणि हिमालयाच्या पार्श्वभूमीवर घडणारी ही कथा तुमचं लक्ष वेधून ठेवते. विशेष म्हणजे, ही कथा भूतकाळ आणि वर्तमानात फिरत राहते, पण त्यामुळं गोंधळ होत नाही, उलट तुम्ही या प्रवासाचा भाग बनता. लेखकाची लेखनशैली साधी असूनही प्रभावी आहे, आणि कथानकातलं रहस्य तुम्हाला शेवटपर्यंत खिळवून ठेवतं.
पात्रांबद्दल बोलायचं झालं, तर कार्तिकनची प्रतिज्ञा खूप प्रभावी वाटली. त्याचा संघर्ष, त्याची भावना, आणि त्याच्या कृतींमागची कारणं तुम्हाला विचार करायला लावतात. राजलक्ष्मी आणि राजसारखी पात्रं वर्तमानकाळाशी आपला संबंध जोडून ठेवतात. कथा पुढे जाताना तुम्हाला काही प्रश्नांची उत्तरं मिळतात, पण काही अनुत्तरित प्रश्न तुमचं मन गुंतवून ठेवतात.
या पुस्तकाचं अजून एक वैशिष्ट्य म्हणजे त्याची भव्य मांडणी. तुम्हाला जणू आर्यवर्तातल्या इतिहासाचं आणि पौराणिक कथांचं मिश्रण एका सशक्त शैलीत वाचायला मिळतं. ही कथा तुम्हाला विचार करायला लावते—मानव आणि दानवांमधल्या संघर्षाचा अर्थ, वर्तमानकाळाशी असलेली त्याची नाळ, आणि या सगळ्यातून उभं राहणारं सत्य काय आहे, हे शोधायचं आव्हान तुमच्यासमोर ठेवते.
माझ्या मते, ऐतिहासिक आणि पौराणिक कथा आवडणाऱ्या प्रत्येकाने हे पुस्तक नक्की वाचावं. तुम्हाला गूढता, संघर्ष, आणि रोमांच अनुभवायला आवडत असेल, तर ‘कार्तिकनची प्रतिज्ञा’ हा एक नक्कीच वेगळा अनुभव ठरेल. सहा हजार वर्षांपूर्वीच्या आर्यवर्तातल्या एका थरारक प्रवासाचा भाग व्हा आणि या कथेसोबत एक अद्भुत वाचन प्रवास घडवा!
